A Agrupación Apícola de Galicia presenta Belacolmea, a liña galega de apicosmética que acompañará aos peregrinos

Belacolmea preséntase como unha liña de apicosmética destinada ao coidado e ao benestar corporal que vén da man do Camiño de Santiago e da IXP Mel de Galicia, disposta a proporcionar conforto aos peregrinos na súa andaina.

O acto de presentación terá lugar mañá no Centro Internacional de Acollida ao Peregrino de Santiago de Compostela, e nel rememorarase a estreita e histórica vinculación existente entre os camiñantes e os produtos da colmea.

Este é un proxecto beneficiario do programa O Teu Xacobeo da Xunta de Galicia.

Mañá martes, 25 de maio, a Agrupación Apícola de Galicia celebra o acto de presentación de Belacolmea, unha liña de produtos naturais a base de Mel de Galicia con Indicación Xeográfica Protexida que promete revolucionar o sector da cosmética.

O acto de presentación terá lugar no Centro Internacional de Acollida ao Peregrino de Santiago de Compostela e contará coa intervención de Cecilia Pereira Miramón, Comisaria do Xacobeo 2021; Segundo L. Pérez López, Canónigo Delegado de Peregrinacións; José María Seijo, presidente da Agrupación Apícola de Galicia; e Ester Ordóñez, veterinaria da Agrupación Apícola de Galicia e presidenta do Consello Regulador da IXP Mel de Galicia. 

O poder terapéutico do Mel de Galicia

Belacolmea nace como unha liña de apicosmética especialmente formulada para o coidado da pel, que busca a prevención e solución de todas as alteracións que esta poida sufrir, a través de formulacións naturais específicas.

Entre as bondades dos seus bálsamos e cremas destaca que concentran os beneficios terapéuticos dos produtos da colmea, ademais de ser aptos para todo tipo de cute, especialmente para peles sensibles ou con tendencia á deshidratación. Ademais, os apicosméticos da firma contan co poder do Mel de Galicia, herdando del a súa capacidade enerxética e as súas propiedades antisépticas, antioxidantes e rexeneradoras, perfectas para paliar as dores e as molestias que sofren moitos peregrinos tras longas camiñadas.

Belacomea estará formada por toda unha gama de produtos destinados ao coidado corporal, a nutrición e a reparación da pel de zonas concretas, como son: bálsamo para pés, ApiReparador bálsamo corporal, ApiDor bálsamo corporal, xabón natural de mel e própole, crema reparadora de mans e unllas, crema facial anti-idade e crema corporal enriquecida. A liña idónea para todas as persoas que queiran levar un estilo de vida máis natural.

Apicultura e peregrinos, compañeiros de viaxe

Nun tributo á senlleira relación entre peregrinos e produtos da colmea, para alén da presentación celebrada en Santiago de Compostela, a Agrupación Apícola de Galicia prevé a celebración de diferentes actos ao longo de distintos puntos do Camiño de Santiago, sempre en estrito cumprimento da normativa de seguridade sanitaria. As datas e lugares daranse a coñecer mañá durante a presentación.