A Agrupación Apícola de Galicia instalará un punto de información e venda de Belacolmea en Dumbría

Será o vindeiro sábado, 18 de setembro, cando a Agrupación Apícola de Galicia leve a súa liña de apicosmética a Dumbría, concretamente, ao Lugar de Olveiroa.

Os camiñantes serán agasallados cun Pack Peregrino composto por tres mostras de apicosméticos destinadas ao coidado e á reparación da pel.

Belacolmea supón a primeira liña galega de apicosmética formulada a base de Mel de Galicia de Indicación Xeográfica Protexida. Un proxecto proxecto beneficiario do programa O Teu Xacobeo da Xunta de Galicia.

Este sábado 18 de setembro, entre as 12 h e as 18 h, a Agrupación Apícola de Galicia ten prevista a instalación dun punto de información e venda de Belacolmea no Lugar de Olveiroa, no municipio de Dumbría —A Coruña—. A elección desta localización non foi en balde, senón por ser un importante enclave para os peregrinos dentro do Camiño de Fisterra e Muxía. Esta ruta xacobea ten a súa orixe na cidade de Santiago de Compostela, mentres que a súa meta se atopa no cabo de Fisterra e no Santuario da Virxe da Barca de Muxía. Fin e inicio de etapa, o Lugar de Olveiroa supón a situación idónea para compartir cos camiñantes os recoñecidos beneficios da apicosmética natural..

Belacolmea materializa a senlleira relación entre peregrinos e apicultura, sendo unha liña de cosmética natural que aglutina os beneficios do Mel de Galicia con Indicación Xeográfica Protexida, así como doutros produtos da colmea como son o propóleo ou a cera.

Que atoparán no punto de información e venda?

Este sábado, no punto de información, os camiñantes recibirán como agasallo un Pack Peregrino composto por tres mostras: un bálsamo para pés de nutrición intensa e os bálsamos corporais ApiDor e ApiReparador. Todos eles contan co poder do Mel de Galicia, herdando del a súa capacidade enerxética e as súas propiedades antisépticas, antioxidantes e rexeneradoras, perfectas para paliar as dores e as molestias que sofren moitos peregrinos tras longas camiñadas.

Do mesmo xeito, ofrecerase información a todas as persoas interesadas no ámbito da apicosmética en xeral, ou en Belacolmea en concreto, para alén de poder adquirir outros produtos pertencentes a esta liña de coidado corporal no mesmo posto.

A quinta de seis paradas ao longo do Camiño de Santiago

Tras pasar por Lalín, O Porriño, Pontevedra, Arzúa e Dumbría, a Agrupación Apícola de Galicia prevé a colocación do último punto de información na vindeira semana. Será o sábado, 25 de setembro, no Cebreiro.

Finalmente, cabe lembrar que Belacolmea constitúe un dos proxectos incluídos no programa O Teu Xacobeo da Xunta de Galicia, orientado á promoción e dinamización do Xacobeo 2021.