A liña galega de apicosmética Belacolmea presenta novo produto mentres recibe aos peregrinos no Cebreiro

O vindeiro sábado, 25 de setembro, a Agrupación Apícola de Galicia instalará un punto de información e venda de Belacolmea no Cebreiro, a última parada desta liña de apicosmética tras un longo percorrido a través do Camiño de Santiago.

Celebrando o final desta andaina, un proxecto beneficiario do programa O Teu Xacobeo da Xunta de Galicia, a Agrupación presentará a última incorporación da súa gama de cosmética natural: un bálsamo labial reparador.

Ao carón da Igrexa de Santa María A Real recibirán aos camiñantes que crucen O Cebreiro, agasallándoos cun Pack Peregrino composto por tres cremas destinadas ao coidado e a reparación da pel.

Lalín, O Porriño, Pontevedra, Arzúa, Dumbría… nos últimos meses, a Agrupación Apícola de Galicia ten percorrido as localizacións máis senlleiras do Camiño de Santiago da man de Belacolmea, a súa primeira liña de apicosmética, encargada de materializar a emblemática relación entre peregrinos e apicultura. Un vínculo establecido dende hai séculos grazas ao poder terapéutico, místico e lendario que os peregrinos outorgaban ao mel galego.

En todos estes municipios, instalouse un punto de información e venda desta liña de cosmética natural que aglutina os beneficios do Mel de Galicia con Indicación Xeográfica Protexida, así como doutros produtos da colmea como son o propóleo ou a cera. Neles, os camiñantes recibían como agasallo un Pack Peregrino composto por tres mostras: un bálsamo para pés de nutrición intensa e os bálsamos corporais ApiDor e ApiReparador. Todos eles con Mel de Galicia na súa formulación, herdando del a súa capacidade enerxética e as súas propiedades antisépticas, antioxidantes e rexeneradoras, perfectas para paliar as dores e as molestias que sofren moitos peregrinos tras longas camiñadasa.

Tras comezar este periplo o pasado día 5 de xuño en Lalín, Belacolmea chega ao final desta “peregrinación” precisamente nas portas do Camiño Francés, recibindo aos camiñantes que accedan a Galicia entre as senlleiras pallozas que gardan séculos de historia. Será este sábado 25 de setembro, entre as 12.00 e as 18.00 horas cando poidamos achegarnos ao seu último punto de información e venda, instalado no Cebreiro —ao carón da Igrexa de Santa María A Real—.

O universo da apicosmética suma un novo produto

A Agrupación Apícola de Galicia non só dará a benvida aos peregrinos, senón tamén ao outono, celebrando esta fin de viaxe co lanzamento dun novo produto que se suma á súa gama de cosmética natural: o Bálsamo Labial Reparador con Xelea Real. A súa formulación aporta unha poderosa hidratación e máxima suavidade aos beizos, ademais de calmar, reparar e protexer fronte aos axentes externos. Algo moi útil e necesario agora que comezan a descender os termómetros e que os nosos beizos precisan un plus de coidado.

Do mesmo xeito, no punto de información e venda ofrecerase información acerca deste e doutros produtos a todas as persoas interesadas no ámbito da apicosmética en xeral, ou en Belacolmea en concreto, para alén de poder adquirir calquera dos apicosméticos pertencentes a esta liña de coidado corporal no mesmo posto.

Finalmente, cabe subliñar que en cada un destes puntos, a Agrupación contou coa colaboración dos consellos reguladores da IXP Mel de Galicia, DOP Queixo Tetilla, DOP Arzúa-Ulloa, DOP San Simón da Costa, DOP Cebreiro, IXP Pan de Cea, IXP Pataca de Galicia e IXP Tarta de Santiago.

Belacolmea constitúe un dos proxectos incluídos no programa O Teu Xacobeo da Xunta de Galicia, orientado á promoción e dinamización do Xacobeo 2021.