Belacolmea chega á Feira do Mel de Pontevedra
Belacolmea protagoniza o seu propio espazo no programa ‘Labranza’ da TVG
Xuño 21, 2021
Belacolmea recibe aos peregrinos en Arzúa
Setembro 1, 2021
O vindeiro sábado, 14 de agosto, a Agrupación Apícola de Galicia instalará un punto de información na Feira do Mel que se celebrará na cidade de Pontevedra, concretamente na rúa Serra, enfronte do Mercado de Abastos.
Os camiñantes que por alí se acheguen serán agasallados cun Pack Peregrino composto por tres cremas destinadas ao coidado e reparación da pel.
Belacolmea supón a primeira liña galega de apicosmética formulada a base de Mel de Galicia de Indicación Xeográfica Protexida. Un proxecto beneficiario do programa O Teu Xacobeo da Xunta de Galicia.
O vindeiro sábado 14 de agosto, entre as 10 h e as 14 h, a Agrupación Apícola de Galicia ten prevista a instalación dun punto de información de Belacolmea na Feira do Mel de Pontevedra, un doce encontro que se celebrará na rúa Serra, enfronte do Mercado de Abastos.
Belacolmea representa a senlleira relación entre peregrinos e apicultura, sendo unha liña de cosmética natural que aglutina os beneficios do Mel de Galicia con Indicación Xeográfica Protexida, así como doutros produtos da colmea como son o propóleo ou a cera.
Que haberá no punto de información?
Este sábado, no punto de información, os camiñantes recibirán como agasallo un Pack Peregrino composto por tres mostras: un bálsamo para pés de nutrición intensa e os bálsamos corporais ApiDor e ApiReparador. Todos eles materializan o poder do Mel de Galicia, herdando del a súa capacidade enerxética e as súas propiedades antisépticas, antioxidantes e rexeneradoras, perfectas para paliar as dores e as molestias que sofren moitos peregrinos tras longas camiñadas.
Nesta ocasión, o punto de información non será tamén de venda. No entanto, nos postos que apicultoras e apicultores pertencentes á Agrupación Apícola de Galicia rexerán na mesma feira, si se poderán atopar e mercar as diferentes cremas e bálsamos que compoñen esta liña de apicosmética.
A terceira de seis paradas ao longo do Camiño de Santiago
A Agrupación Apícola de Galicia xa estivo presente en Lalín e O Porriño durante o mes de xuño, e prevé a colocación de tres puntos de información máis ao longo do mes de setembro. Todas estas localizacións comparten o feito de ser zonas de tránsito ou chegada dos camiñantes que estean a realizar algunhas das rutas xacobeas. Concretamente:
- Sábado 4 de setembro: Ribadiso (Arzúa)
- Sábado 18 de setembro: Dumbría
- Sábado 25 de setembro: O Cebreiro
En cada un destes puntos, a agrupación conta coa colaboración dos consellos reguladores da IXP Mel de Galicia, DOP Queixo Tetilla, DOP Arzúa-Ulloa, DOP San Simón da Costa, DOP Cebreiro, IXP Pan de Cea, IXP Pataca de Galicia e IXP Tarta de Santiago.
Finalmente, cabe lembrar que Belacolmea constitúe un dos proxectos incluídos no programa O Teu Xacobeo da Xunta de Galicia, orientado á promoción e dinamización do Xacobeo 2021.
