O concurso de fotografía Abellas ao Voo, organizado pola Agrupación Apícola de Galicia, xa ten gañadores
A Agrupación Apícola de Galicia e Mel de Galicia, protagonistas dun espazo na Revista da Fin de Semana
Abril 15, 2021
A Agrupación Apícola de Galicia avisa sobre a mortaldade das abellas por falta de alimento
Maio 14, 2021
A Agrupación Apícola de Galicia deu a coñecer as tres fotografías que acadaron a maior puntuación de entre as máis de 50 instantáneas participantes no seu concurso de fotografía
O pasado 20 de marzo, no marco da XXXIII Feira Apícola das Rías Baixas, a Agrupación Apícola de Galicia anunciaba a convocatoria do primeiro concurso de fotografia Abellas ao Voo, cuxo obxectivo sería premiar aquelas instantáneas que captasen a beleza das abellas na súa cotiandade mentres interactuaban coa contorna. O prazo de finalización do mesmo sería o pasado 5 de abril, momento no que se realizaría unha compilación das imaxes e posterior valoración.
Sen dúbida, a iniciativa tivo unha gran resposta, sendo máis de medio centenar de imaxes as que lograban entrar a concurso para, posteriormente, ser avaliadas por un xurado experto. Finalmente, o ditame deste tríade formado por un membro da Agrupación Apícola de Galicia, o fotógrafo profesional Ángel Sotelo e un compoñente da axencia de branding Naranjalimón Branding 360º, deuse a coñecer hoxe, 19 de abril.
‘Chegar e encher’ de Arsenio Blanco faise co primeiro premio
Tras realizar o reconto das redes sociais e de sumar as puntuacións outorgadas polo xurado, a fotografía Chegar e encher, de Arsenio Blanco, acadaba o primeiro premio cun total de 20 puntos. Cunha puntuación de 16 ségueo Xabier González, autor de Retrato intimista dunha abella quen se coloca en segundo lugar. Finalmente, o terceiro premio recaería en Que rico está todo e na súa artífice, Susana Fernández, cun total de 14 puntos.
Retrato intimista dunha abella, por Xabier González 
Que rico está todo, por Susana Fernández
Unha fototeca con sección propia
Dende a Agrupación Apícola de Galicia queren agradecer a gran acollida que tivo a primeira edición deste concurso fotográfico para profesionais e afeccionados, así como destacar a calidade e a valía das fotografías realizadas por todos os participantes que quixeron achegar un pouco máis o universo da apicultura ao público en xeral. Co fin de recoñecer o seu labor e esforzo, todas as imaxes que entraron a formar parte de Abellas ao Voo estarán presentes nunha sección da web que promete visibilizar o seu traballo.
