A Feira Apícola das Rías Baixas chega á TVG da man de ‘Quen anda aí’?

Roberto Vilar e Raquel Atanes aproxímanse ao apaixonante mundo da apicultura e do mel con Ester Ordóñez, veterinaria da Agrupación Apícola de Galicia e presidenta da IXP Mel de Galicia, e Beatriz Ríos, técnica e formadora do panel de cata da IXP Mel de Galicia

Este 29 de marzo, o programa protagonista das tardes da Televisión de Galicia, ‘Quen anda aí?’, dedicaba un espazo á Feira Apícola das Rías Baixas e, en concreto, á cata virtual comentada que terá lugar no marco das Xornadas Internacionais de Apicultura.

No magazine conducido por Roberto Vilar, Ester Ordóñez, en representación da Agrupación Apícola de Galicia, e Beatriz Ríos, técnica e formadora do panel de cata da IXP Mel de Galicia, expoñían a íntima relación existente entre a apicultura, o mel e o territorio sendo a súa orixe a que marca moitas das súas diferenzas. Precisamente para poñer este punto de manifesto, durante a cata virtual comentada que se celebrará o vindeiro sábado, 9 de abril, no marco da Feira Apícola das Rías Baixas, as persoas inscritas poderán emprender unha viaxe sensorial a través dos meles da IXP Mel de Galicia e da DOP Miel de la Alcarria, sendo así conscientes destas diferenzas.

Xornadas Internacionais de Apicultura

Como o seu propio nome indica, as Xornadas Internacionais de Apicultura contarán con profesionais altamente cualificados procedentes de países coma Francia, Italia ou Arxentina. A través dos seus relatorios, encargaranse de abordar as temáticas que máis preocupan ao sector, vencelladas coa saúde das abellas, o futuro da colmea e incluso da propia apicultura.

Deste xeito, as persoas que conecten en streaming o vindeiro 9 de abril, entre as 10.30 h e as 20.30 h, con estas xornadas celebradas integramente online en rigoroso directo, poderán asistir á exposición de temas coma: ‘Innovación no proceso produtivo para unha apicultura sustentable’, no que a Agrupación Apícola de Galicia exporá os primeiros resultados dos seus estudos de cara a unha revolucionaria innovación tecnolóxica que facilitaría o traballo nos colmeares. A seguir, o francés Gilles Fert, un dos apicultores, consultor e formador máis recoñecidos a nivel mundial, abordará acría de raíñas no seu relatorio ‘Por que é bo e importante manter raíñas xóvenes nas vosas colmeas’. Dende Italia, Antonio Nanetti, membro do Consello de Investigación Agrícola e Análise de Economía Agrícola deste país, abordará o ‘Uso do Ácido Oxálico fronte ás enfermidades da Apis mellifera’ como pode ser a temida varroa. Finalmente, o médico veterinario especialista en produción apícola E. Martín Colombani, instruirá aos presentes dende Arxentina acerca do ‘Manexo posinvernal das colmeas de Apis mellifera’ para evitar a súa morte unha vez comece o inverno.

Agardámosvos na feira máis melosa de Galicia!

Preme aquí para ver o programa ao completo