O Porriño acolle a XXXVII Feira Apícola das Rías Baixas cun sector en auxe e apoio institucional

A conselleira do Medio Rural, María José Gómez, participou na inauguración da XXXVII Feira Apícola das Rías Baixas-Bee Happy Market, celebrada no concello pontevedrés do Porriño. Estivo acompañada pola delegada territorial da Xunta en Vigo, Ana Ortiz.

Durante a súa intervención, Gómez destacou o potencial do sector apícola galego, que sitúa a Galicia como a terceira comunidade autónoma con maior número de explotacións. Subliñou tamén a importancia da Indicación Xeográfica Protexida (IXP) Mel de Galicia, que en 2024 acadou unha produción de máis de 200.000 quilos, xestionados por 240 produtores e case 40.000 colmeas, cun valor económico superior aos 1,8 millóns de euros.

A conselleira fixo referencia tamén ao crecemento do mel ecolóxico galego e ao papel dos 12 envasadores rexistrados dentro do distintivo Artesanía Alimentaria, que contribúen a dar visibilidade e calidade ao produto.

Gómez reafirmou o compromiso do Goberno galego co sector, lembrando que a Xunta leva investidos máis de 10 millóns de euros nos últimos anos en liñas de axuda específicas para fomentar a apicultura. Estas achegas inclúen accións para combater pragas como a avespa velutina ou enfermidades que afectan ás colmeas.

A maiores, lembrou que a Consellería xestiona dúas liñas específicas dentro da Política Agraria Común (PAC): unha para apicultura vinculada á biodiversidade e outra dirixida á apicultura ecolóxica. Tamén se impulsan accións de promoción de produtos con selo de calidade, como a IXP Mel de Galicia, en eventos gastronómicos e feiras do sector.

A conselleira puxo en valor o simbolismo desta feira, que “permite exaltar un produto estreitamente ligado á nosa historia e tradicións”, e destacou a presenza da apicultura na paisaxe galega a través das alvarizas, elementos que cualificou como “exemplo da arquitectura tradicional e parte esencial da riqueza etnográfica de Galicia”.

Diario de Santiago